今早去到茶餐廳，有客人話昨天揸車落斜時唔覺意入了空波，汽車失去動力，但因為是落斜，汽車自行加速，好彩及時剎制，否則一定會釀成車禍。
近日有不少人問我，樓市在撤辣之後點解仍然下跌，尤其是工商舖物業，是否經濟環境太差，但眾所周知，香港經濟又不是太差，每逢假日，不少香港人就算唔去日本、韓國，都會北上消費，但點解經濟環境不俗，樓市仍然下跌，是否港人對香港前途信心不足，寧願消費都唔買樓。
香港人並不是對香港沒有信心才唔買樓，而是擔心買樓之後搵唔到銀行做按揭而要撻訂，最後令到樓市就好似一架
失去動力汽車，不但不會上升，而且會愈跌愈急，至於什麼是樓市動力，有人話是購買力，但購買力仍然要有動力才會出現，在現時來說，樓市動力是銀行按揭，銀行唔做按揭，好似汽車失去動力，樓市下跌是必然的事，而且會愈跌愈急。
近日有不少投資者賣樓，唔係沒有買家，而是搵唔到銀行做按揭，買家見銀行唔敢做按揭，認為銀行睇淡樓市，他們又點敢入市，市場於是又失了一單交易，成交量低是市場大敵，現在樓市好似汽車落斜時失了動力，只會愈跌愈急，直至銀行回復做按揭為止。好彩現在已經有銀行願意為客戶承做按揭，即時給樓市注入動力，樓價就算不會即時回升，但就唔會繼續下跌，好似失去動力的氣車落斜時剎掣一樣，就算不能即時剎停，但最低限度都受到控制。
