有不少人問我，政府已經撤辣，香港同業拆息亦維持在低水平，買樓的人愈來愈多，潛在供應量亦下跌，但點解樓價唔升，倘若那些利好因素消失，樓價豈不是會急速下跌，所以，不少專家睇唔好樓市是有道理。
香港樓市現在情況就好似擺酒宴客，主客未到，主人家唔會開席，其他客人食住花生等，千祈唔好叫主人開席，否則主人會話如趕時間，客人可以先行離開，他不會挽留，變成客人自取其辱，講咗咁耐仍然未講樓市主客的名字，他叫Confirmor確認人，在唐朝已經出現名字，Confirmor出現，樓市一定會調頭回升。
Confirmor這個尊貴客人，只會在香港合法出現，就算出現在其他地方，合法性是存疑，但如果回到唐朝，就真係好奇怪，Confirmor是合法的，不過，當時並不叫確認人，而是叫留後。
唐朝行節度使制，以三鎭節度使安祿山為例，不時要去長安見唐玄宗李隆基以及楊貴妃，他知道自己離開范陽之後，下屬隨時會做反，或者朝廷會派另一位節度使代替他，咁樣就唔可以再返范陽，於是確認一個人為節度使，那個人一定要係親信，因為在確認之後，安祿山反而沒有實權，所以，最初時由部將史思明暫代，後來改為兒子安慶緒，不過，即使係兒子都過唔到權力這關，由於沒有法律保障，安祿山最後被安慶緒殺死。
香港業主在賣樓時，如果簽了一份必買必賣合約，即使只是收了訂金，都已經失去業主實權，唔可以將物業賣俾其他人，反而新買家可以用確認人身份將物業轉售圖利，或者可以叫他們做炒家，政府出招就是要對付那班人，有一段時間，炒家已經消聲匿跡，政府官員唔知道，沒有炒家樓市，如同一個沒有玫瑰保護的葡萄園，不能抵擋徽菌入侵，或者並不是玫瑰可以抵擋徽菌入侵，而是當徽菌入侵時令玫瑰凋謝，令葡萄莊園的主人有所警惕，樓市也是一樣，沒有炒家犧牲，樓價可以在失驚無神下跌三成，甚至影響香港人消費能力以至整體經濟。
現在Confirmor返嚟啦，最近有不少在物業成交前短炒賺錢個案，本來報紙只會報道劈價蝕讓，
對短炒賺錢不會報道，令到一般市民以為樓市仍在下跌中，但由於短炒賺錢的個案實在太多，而利潤亦很深，由十幾個%到二十幾個%都有，報紙亦不得不報道，相信短炒賺錢的個案會愈來愈多，樓市即將調頭回升，仍未買樓的人不算慘，那些在沒有迫切性需要的情況下，將自住單位賣走的人是最慘，要買返唔係咁容易。
