有老友問我，在香港政府附屬，而又獨立運作的機構之中，邊間最賺錢，邊間最蝕錢，我話很難回答，就算問政府官員都唔知，雖然有人話稅局最賺錢，但稅局只是收過路錢，唔係賺錢，馬會又唔屬於政府，所以，我認為港交所是最賺錢的機構，不過，在樓市未下跌之前，港交所未必是最賺錢的機構，或者應該是按揭證券保險公司。

　　政府要求做八成或者九成按揭的業主要買按保，倘若他們唔供樓，銀行拍賣物業之後，如果唔夠還按揭貸款，按保公司就要替那些人還錢，在樓市上升的時候，首先那些買了按保的業主唔會唔還債，就算他們唔還，銀行收樓後拍賣，大多數可以清還貸款，按保公司只是收保費，不用賠償，真係賺錢賺到笑，但樓價下跌之後，莫講做九成，就算做八成按揭，那些人已經變成負資產者，如果他們放棄，按保公司是要替那些業主補差額，所以，按保公司現在都幾頭痛。

　　有俾銀行call loan call到失魂，最後被迫賣樓的老友話，如果當時有買按保，就唔使擔心銀行call loan，老友的物業只借五成，應該唔夠資格買按保，如果按保公司可以向任何做了按揭的業主提供按保，銀行就不會向那些業主追差額，樓價亦不會下跌，按保就沒有風險，根本可以躺平賺大錢，但法例規定按保公司只能向那些借了最少八成的業主提供保險，即是迫按保公司蝕錢，所以，政府應該開放按保公司向任何買了樓的業主做按揭保險，咁樣做並不是保護業主，而是保護銀行，開放之後，按保公司想蝕都難。